! الثانويه البطيخ

السلام عليكم و رحمة الله و بركاته


لما عملت المدونه ما كنتش عارف اعملها ادبيه و فقط و للا اتطرق لمواضيع تانيه ..


بس الظاهر الحياه ما ينفعش فيها الأدب ..


مش الأدب العام يعني .. أقصد الأدب الفني :)


عشان كده نويت و النيه علي الله اني احاول اتطرق لمواضيع تانيه عشان الناس ما تملش


و كل حين و حين ابقي اكتب حاجه ادبيه لمحبي الأدب :)


-------


قعدت امبارح أدور علي النت علي حاجه عدله الواحد يكتب عنها ما لقيتش الصراحه غير حدث لبناني أكيد كلكوا عارفينه

أقصد قضية الأسري اللبنانين و استبدالهم برفات الجنديين الإسرائليين



و حدث مصري بيتكرر كل سنه بس السنه ديه كان بشع شويتين .. :(


عرفتوه ..؟


طيب انا اقصد نتيجة الثانويه الغامه او زي ما اتعودت انا واصحابي علي ايامنا اننا نقول عليها


ومقارنة باللي بيحصل دلوقتي الظاهر ان ايامنا هي اللي كانت كلها سعاده و سرور و بشر ..


عموماً انا شايف ان نظام الثانويه العامه ده مش جايب همه ..


هوه جايب الـ " هَـم " بس للطلبه المساكين و لأولياء الأمور ...


طبقاً لموقع اخوان اونلاين


النتيجة بلغت نسبة النجاح فيها من المرحلة الثانية هذا العام 81.4%، وانخفضت بنسبة 1.7% عن العام الماضي، وبلغت نسبة النجاح في المرحلة الأولى 69.6% مسجِّلةً انخفاضًا ملحوظًا عن العام الماضي وصلت إلى 6.3%، أكدت حقيقة ما تعرَّض له الطلاب من ظلمٍ بيِّن من واضعي الامتحانات؛ حيث أظهرت الإحصائيات انخفاض عدد الحاصلين على نسبٍ أعلى من 95% عن العام الماضي بمقدار 17 ألف طالب، وبلغ عدد الحاصلين على 95% فأكثر هذا العام 16 ألفًا و137 طالبًا مقابل 33 ألف طالب العام الماضي، كما انخفضت نسبة الحاصلين على 90% فأكثر بمقدار 10 آلاف طالبٍ عن العام الماضي، وحصل 42 ألفًا و980 طالبًا على نسبة 90% فأكثر هذا العام مقابل 52 ألف طالب العام الماضي.


يعني زي ما انتوا اكيد اخدتوا بالكوا .. نسبة اللي هيدخلوا جامعات عدله السنه ديه قللت النص مره واحده !


و لأن حلم ان مجاميع التنسيق تنزل ديه وهم كانوا كل سنه يوهمونا بيه و عمره ما بيتحقق


هما دلوقتي بيحاولوا يخفضوا عدد المقبولين في الجامعات عن السنه اللي قبلها بالطرق اللي انتوا شايفينها دلوقتي


1- يصعبوا الامتحانات


2 - يعلوا التنسيق


3 - و ديه الأهم ان النتيجه بالحفظ


اللي حفظه حلو يدخل كليه علميه .. مع ان الكليات العلميه و الله العظيم لا ليها اي علاقه لا من قريب و لا من بعيد بالحفظ


المهم ان الطالب حتي لو مش عاوزها يدخل عشان المجموع خساره .. و مش فاهم بالظبط يعني ايه الجمله ديه و خساره في مين او لمين بالظبط بس ما علينا


اللي حظه وحش بقي يروح يتشحطط في الجامعات الخاصه اللي بقت تعمل تنسيق داخلي دلوقتي هي كمان


اومال ايه ..


و بقي التنسيق هيحدد هتدفع كام و هتدخل ايه برده ..


يعني لا اللي معاه فلوس بقي مستريح و لا الغلبان اللي كان حاطط كل امله علي الحكومه استريح ..


و ختاماً


بما ان التعليم كله بايظ من اساسه ..


فما جتش علي الثانويه ..


كله بطيخ ..


و للا ايه رأيكوا ؟!

9 تركوا بصمتهم:

اللؤلؤة said...

أنا رأيي إن حضرتك كنت تأخر الموضوع ده لحد ما اخلص السنة دي
أعصابي كانت تعبانة بس
دلوقتي بقت مدمرة والحمدلله
:D

طبعاً الحقيقة اللي محدش يقدر ينكرها هو فساد التعليم في مصر
بايظ ذي مابتقول
خاصة الأزهر
يعني حضرتك بتتكلم على ثانوية تربية وتعليم
بالنسبة لنا موادهم تلت موادنا
هم 5 مواد واحنا 15
يعني مين اللي ليه حق ينتحر بجد
!

الثانوية بالذات بتمر بتلات مراحل
المذاكرة
ورقة الأسئلة
التصحيح
الأولى بنبذل كل وسعنا فيها الحمدلله
التانية منهم الله ورقة الأسئلة لازم تيجي فيها حاجة خارجة عن المنهج...او تكون معقدة ومش مباشرة ..أي حاجة المهم يعقدوها
التالتة دي اللي بجد منهم لله
يبقى الطالب مذاكر وتعبان طول السنة ويجاوب كله صح واللي بيعلم حضرته مش واخد باله من سؤال...ويضيع الطالب
واحدة صاحبتي عملت اعادة تصحيح لماكانت في الثانوية لقت في مادة سؤال بحاله ماتحطش فيه قلم! .. نساه المصحح...طب والموجه؟ !!
بجد مهزلة

---------
يعني لا اللي معاه فلوس بقي مستريح و لا الغلبان اللي كان حاطط كل امله علي الحكومه استريح ..
---------
لسا امبارح بتكلم مع صحبتي في الموضوع ده..وقالت لي نفس الجملة
هم عايزين كل الشباب يبقوا عمالة..بجد بيحطموهم..كأنهم بيقولوا مهما تعملوا مش هتنجحوا
دكاترة وصيادلة ولا مهندسين ليه؟؟
كتير عليكو

ربنا معانا
إحنا هنعمل اللي علينا
"و"إن الله لا يضيع أجر من أحسن عملاً
ولو اتظلمنا يبقى حسبنا الله ونعم الوكيل بجد

جزاكم الله خيراً أخ ابن آدم
دعواتك

عاشقه الاقصى said...

جزاك الله خيرا بجد على الموضوع

بس عايزه أقولك حاجه

مهمه الأساس أصلا مش تمام

وهما عايزين يعملوا فيها فراكيكو

ويصلحوا كحد قولهم من النص
تخيل

بصراحه ربنا يكون فى عون طلبه الثانويه العامه

والحمد لله ان احنا فلتنا

بجد مدونتك ماشاء الله عليها

ان شاء الله اكون ضيفه مستمرررررررره

هنا

بس ياريت متزهقش منى

دمت بخير

إخوانى حتى النخاع said...

السلام عليكم


والله يا بنى آدم مش عارف الحكومة عاوزة تعمل فينا إيه ؟؟!!!


لو نفترض إلى إحنا هندخل الواد كلية خاصة

نجيب منين كل سنة 42 ألف ؟؟

هما شايفنا بنبيض دهب شكلهم

والله يا جدع حاجة تعل خاااااااالص

وفى الآخر الواد بيطلع عطلان


انا مش عاوز ادخل الثانوية العامة خلالالالالالالالالالالاص :)

تشكر يا باشا على البوست دا


أخووك

ابن ادم said...

الاخت الكريمه اللؤلؤه :

لا جدال طبعاً في ان الأزهريين بيطحنوا أكتر من العوام ..

بس عزاكم الوحيد ان تعبكم ما بيروحش علي الارض ..

يعني تعتبر مجاميعكم الي حد ما مش سيئه او زي الناس التانيه ..
أو علي الاقل لحد اما كنت لسه في التعليم كانت كده !

جزاكم الله خيرا علي المرور ..

ابن ادم said...

الاهت الكريمه عاشقة الاقصي

تواجدك الدائم يشرفني يا فندم ..

و كلامك مظبوط .. ما ينفعش واحد يجي يصلح حاجه يبدأ من النص ..

بس ده لو هما بيصلحوا اساساً .. هما بيهدموا للأسف من فوق و من تحت و النص ..

باب النجار مخلع علي رأي المثل

بارك الله فيكم و جزاكم الله خيرا علي التعليق و المرور

ابن ادم said...

نخاعي حبيبي :)

شرفت المدونه يا باشا .. انزلك سحلب ؟!

:))))


الهدف حالياً اصبح ان التعليم يبقي للقادرين جدا جدا جدا ..

عشان ما يبقاش في حاجه اسمها طبقه متوسطه ..

و يبقي ابن الوزير الفاشل احسن من ابن الغفير المثقف المتعلم ..

ده ببساطه اللي عز الطبال عاوز يطبقه في مصر ..


ما تقطعش الجوابات بقي يا معلم و زورنا علي طول :)

الف شكر

اللؤلؤة said...

سلام عليكم
---
بس عزاكم الوحيد ان تعبكم ما بيروحش علي الارض ..

يعني تعتبر مجاميعكم الي حد ما مش سيئه او زي الناس التانيه ..
أو علي الاقل لحد اما كنت لسه في التعليم كانت كده !

---
لأ طبعاً ! مجامعينا والتنسيق ذيه ذي العام بالظبط
ويمكن أكتر..والتصحيح فيه ظلم جدا وصعوبة في اعادة التصحيح..كل دي مشاكل موجودة في الأزهر بردو
يعني دلوقتي مفيش فرق بين أزهر وعام
الا كثرة المواد في الازهر
انما التنسيق والمجموع..من مدة كبيرة جدا وهو عالي
يعني الطب من 99.5
والصيدلة من 98وشوية
والهندسة تقريبا97.3
ده على أساس السنة اللي فاتت

نظام غريب مفروض علينا
ربنا يقدرنا


عذرا..كان مرور سريع لتصحيح المعلومة
جزاكم الله خيراً

ابن ادم said...

ايـــــــــــه ؟!؟

و في اقصي تقدير كنت اظن ان كل من يحصل علي فوق الـ 95 يدخل الطب


لأ كده .. يبقي ربنا في عونكم فعلاً ..

وفقكم الله و جزاكم الله خيرا علي المرور

yosof fd said...

عشلن تعرف اننا مظالييييييييم
:D....وان مجموعي يضرب مجموعك بال

مش تقول انك عامل مدونة يابني ادم.

عالعموم مدونة راااااائعة

وان شاء الله اتابع باستمرار
..ابن خالتك